""" ياصاحبي صديت"""
ياصاحبي صديت عني وقفيت
وأنا موريكـ الغلا والحشيمه
تبي تمللني وأنا منكـ مليت
ماني بمن يرضى لنفسه هضيمه
أخلفت ظني فيكـ يوم إني أشقيت
أبي النعيم وصار ضده جحيمه
سيور ماتذكر اذا أصبحت وأمسيت
هاكـ الليالي اللي صفا لكـ نعيمه
ياصاحبي صديت عني وقفيت
وانا موريكـ الغلا والحشيمه
===============================================
""" داعي الأشواق """"
داعي الأشواق نادانـي الحنيـن
جيت لك من كل غربات السنين
جيت لك فوق الليالي الساليـات
يم فجرك يا شعـاع الناظريـن
جيت أسابق فرحتي يـا منيتـي
و أطبع أشواقي على نور الجبين
و أغسل أيامي بهتانـك مطـر
و ألبس من الليل ثوب العاشقين
يا حبيبي خذ حياتـي و ضمهـا
دفها عن برد صحراء التايهيـن
و املها حب و حنـان و ردهـا
حاجتي لك كبر دنيا المغرميـن
عاند بحسن الإله اللـي عطـاك
و اذبح العذال و اللي حاسديـن
و اترك الوجد و ليالي الساهرين
لي أنا بكفيـك حـب العالميـن
================================================
""" لايطول غيابك """
لايطول غيابك ... ثم اخذ عليه
لو تخليت عنى ... عنك قلبي ماتخلى
العذر والتعلل والحكي ... مانبيه
من تحرك فؤاده ... بالهوى ماتخلى
طبعي الصبر لكن وش عليه ارتجيه
من طويل الصبر يعقوب وايوب ملا
دامني حي عطني وش بقي نحتريه
مابي دموعك ...اللي عقب موتي تهلا
مابقي بالعمر مقدار ماراح فيه
كل مازل يومٍ ... يوم بالعمر ولى
مايعرف الجمر مثل الذي يكتويه
احد يدفا بناره ... واحد فيه يتصلى
يامن القلب حطيته براحة يديه
مارضى له مكان غير كفك محلا
كم تعذر وعيا عن هوى محتويه
لين طاح بيمينك بالغرام وتجلى
